5 garchons dins che swing !

16/04/2010 20:01

Chalut mes gins ! Com’ tous ches jours, j’eum sus mise in quête d’eune info. D’autint qu’cha n’est pon ch’qui minque, in n’intind même pus ch’clapotis d’rumeur. J’ai comminché à raviser quo qu’i ch’pachot et j’avoue qu’cha m’a laiché perplexe. In ouf’ ch’procès d’Brice Hortefeux, l’invinteur à ches dépens d’quind i y in a un cha va, ch’est quind i y in a gramint qu’i y a des problèmes. Du cop, j’eum sus dit, just’mint, in n’in a qu’un et cha fait des problèmes. Inchuite, j’ai vu un tite qui m’a fait sourir’te : Apathie et la nunucherie d’Titine. J’étos d’jà à m’dir’te, ch’est du bion, cha promet eune bielle tirate. Fais cauffer tin clavier, Marie ! Mais rin ! Com’ i a parlé d’cha ch’matin, i faut laicher ch’timps à l’info d’armonter. Nin, nin, nin ! Pon l’peine d’ajouter jusqu’à sin cerveau. Loana alle sort sin nouvieau clip. Vingt dius ! Alle arprend La Madrague d’BB. Alle est chu un queval. Cha, in savot d’jà qu’alle étot cavalière. Oh, pis, zut ! In va faire eune pausse dins l’actu, j’vais t’parler d’un spectaque que j’ai vu, i n’y a pon longtemps. Un tiot cop d’musique pour ch’ouiquend, cha ne f’ra pon d’mau…

Chi t’as invie de t’faire vraimint plaiji, j’te conseill’te d’aller à un conchert d’ches Swingin’ Partout. Com’ sin nom l’indique, cha swingue et com’ is tourn’tent gramint, même dins d’autes pays qu’eul France, ch’est vraimint partout ; même dins tin pat’lin ! Chinon te vas ingueuler ch’ti qui ch’occupe d’ches affaires culturelles d’eum part. Quind t’es bin installé chu t’caïelle et que ch’leumière alle ch’éteint, te peux t’attinde à ête trinsporté dins eune aute diminchion. Eune diminchion jazz, mais pon un jazz intindu, calibré, convinchionnel. Cha nin ! Un jazz manouche déchaîné, bin loin de ch’que t’as pu acouter jusque-lal. In fait, ch’est dû à ches diverses influinches d’ches musichiens. Ah, ch’est vrai, j’auros p’t-ête dû commincher par ch’début. J’sus tell’mint pressée qu’j’ai oublié de t’parler d’ceusses qui vontent t’trinsporter pindint tout l’show…

Swingin’ Partout, ch’est chinq musichiens chu schène. Bah, ouais, forchémint aveuc leux instrumints ! Un musichien chins sin instrumint, ch’est com’ un gruyère chins trou. Ch’est sûr’te, chi te veux les avoir dins tin salon, is prenn’tent gramint d’plache, mais i y a eune soluchion, in va vir cha après. J’arviens à ches chinq gars. I y a Giorgio à l’guitare, Sandro à l’mandoline. Bah, nin, j’te fais marcher. Cha, ch’est Gigi l’Amoroso. Ichi, cha s’rot plutôt Djédjé l’Amoroso, alias Jérémie au violon. Et in peut dir’te qu’i t’sort ches violons un max, Jérémie ! In vot vraimint qu’i est qué d’dins quind i étot tiot. Nicolas et Aldo à ches guitares. Parel, te sais tout d’chuite que ch’est pon des gratteux du diminche. Giovanni à l’contrebasse qui n’fait qu’un aveuc alle. Du moins, t’as l’imprèchion qu’i fait un slow aveuc tell’mint i est pris par ch’musique et Nicolas – ouais, t’in as un deussième pour ch’même prix – à ches percuchions, qui donn’te ch’rythme à toute l’compagnie.

Chinq musichiens d’influinches auchi variées que ch’Clachique-Jazz, ch’Clachique-Rock, ch’Blues-Funk-Picking, ch’Clachique-Afro-Cubin et ch’Jazz-Swing-Hard alles fontent toute l’richesse d’euch quintette. Cha ! Chi te t’attindos à l’dinche des canards, ch’est complèt’mint raté. Quoque… Ch’qui caractérise auchi ch’groupe, ch’est l’humour qui ch’in dégage. Très profechionnels, ch’est évidint, cha n’les impêqu’te pon d’distiller quéques notes d’humour dans leux morcieaux. Et quind j’dis notes, ch’est égal’mint au sins musical d’euch terme ! Ch’est ainchi, par eximpe, que Jérémie i arrif’ aveuc sin violon à t’faire eune sirène d’pompier, des mouettes aud’chus d’eul mer et même quéqu’un qui ronfle, ch’est bluffant ! Alors, j’sus sûr’te qu’chi in leu d’mindot, et vu l’humour d’euch groupe, is arriv’rotent à t’la faire à leu sauce, ch’dinche des canards, et t’in s’ros baba !

Ch’qui caractérise auchi ches Swingin’ Partout, ch’est eune grinte complicité intre eusses qu’te peux armarquer à ches premières notes. Malgré toutes ches influinches variées, ch’est ch’t’amour commun pour ch’qu’in appell’te Jazz européen qui crée eune harmonie chins faille. In particulier ch’t’amour pour ch’ti qui est l’référinche incontestape Django Reinhardt. Et cha, te peux t’in aperchevoir très vit’ auchi. In pourrot dir’te qu’ches Swingin’ Partout is sontent ches chinq mousquetaires d’euch jazz manouche. Un pour tous, tous pour Django ! Toudis i est qu’te n’es vit’ pus maîte d’tin esprit. T’es pris dins ches rythmes indiablés mélingeant subtilemint des grinds clachiques, com’ ches zis noir’tes, à des composichions originales faites par tel ou tel membre d’euch groupe, com’ les Brigades du swing, Rumba peña ou cor’ Quai de la seine…

Et cha com’ cha qu’te t’artreuves à l’fin d’euch conchert et qu’te n’as pon vu ch’timps pacher. Mais just’mint, i y a un moyen bin simpe d’prolonger ch’t’osmose et ch’goût d’trop peu, même ch’is t’ontent mis eune sacrée dosse. Ches Swingin’ Partout is vienn’tent d’sortir leu deussième album, bon swing… bon genre. In pus, te sais ch’qu’in dit, quind in a querre, in n’compte pon, alors ch’est carrémint un doube cédé qu’te vas pouvoir acater pour acouter à t’baraque. Forchémint, ch’est pon chez tin boucher qu’te peux l’acater, in d’mindint d’tin mette deux trinches, mais dins ches Fnac, ch’Furet d’euch Nord, chu leu chite, à l’fin ds concherts et chi te n’sais toudis pon, te m’invoies un mail. Je f’rai ch’facteur jusqu’à leu quartier général, ch’roulotte du Swingin’. Vingt tites pour ch’pus grind plaiji d’tes orelles et qu’te pourras acouter et acouter cor’ chins modérachion. Te vos, ch’est vaqu’mint pus pratique pour tin salon et te peux les imm’ner partout. Dins ta carette, à tin bureau. Te peux même mettre cha un em’pétros pour courir aveuc et t’donner du courache. Com’ cha, te sauras vraimint qu’cha swingue partout aveuc ches Swingin’ Partout !

5 garçons dans le swing !

Salut mes gens ! Comme tous les jours, je me suis mise en quête d’une info. D’autant que ce n’est pas ce qui manque, on n’entend même plus le clapotis de rumeur. J’ai commencé par regarder ce qu’il se passait et j’avoue que cela m’a laissé perplexe. On ouvre le procès de Brice Hortefeux, l’inventeur à ses dépens de quand il y en a un ça va, c’est quand il y en a beaucoup qu’il y a des problèmes. Du coup, je me suis dit, justement, on n’en a qu’un et ça fait des problèmes. Ensuite, j’ai vu un titre qui m’a fait sourire : Apathie et la nunucherie de Titine. J’étais déjà à me dire, c’est du bon, ça promet une belle tirade. Fais chauffer ton clavier, Marie ! Mais rien ! Comme il a parlé de cela ce matin, il faut laisser le temps à l’info de remonter. Non, non, non ! Pas la peine d’ajouter jusqu’à son cerveau. Loana sort son nouveau clip. Bon sang ! Elle reprend La Madrague de BB. Elle est sur un cheval. Ca, on savait déjà qu’elle était cavalière. Oh, puis, zut ! On va faire une pause dans l’actu, je vais te parler d’un spectacle que j’ai vu, il n’y a pas longtemps. Un petit coup de musique pour le week-end cela ne fera pas de mal…

Si tu as envie de te faire vraiment plaisir, je te conseille d’aller à un concert des Swingin’ Partout. Comme son nom l’indique, ça swingue et comme ils tournent beaucoup, même dans d’autres pays que la France, c’est vraiment partout ; même dans ton patelin ! Sinon tu vas engueuler celui qui s’occupe des affaires culturelles de ma part. Quand tu es bien installé sur ta chaise et que la lumière s’éteint, tu peux t’attendre à être transporté dans une autre dimension. Une dimension jazz, mais pas un jazz entendu, calibré, conventionnel. Ca non ! Un jazz manouche déchaîné, bien loin de ce que tu as pu écouter jusque-là. En fait, c’est dû aux diverses influences des musiciens. Ah, c’est vrai, j’aurais peut-être dû commencer par le début. Je suis tellement pressée que j’ai oublié de te parler de ceux qui vont te transporter pendant tout le show…

Swingin’ Partout, ce sont cinq musiciens sur scène. Bah, oui, forcément avec leurs instruments ! Un musicien sans son instrument, c’est comme un gruyère sans trou. C’est sûr, si tu veux les avoir dans ton salon, ils prennent beaucoup de place, mais il y a une solution, on va voir cela après. Je reviens sur ces cinq gars. Il y a Giorgio à la guitare, Sandro à la mandoline. Bah, non, je te fais marcher. Ca, c’est Gigi l’Amoroso. Ici, ce serait plutôt Djédjé l’Amoroso, alias Jérémie au violon. Et on peut dire qu’il te sort les violons un max, Jérémie ! On voit vraiment qu’il est tombé dedans quand il était petit. Nicolas et Aldo aux guitares. Pareil, tu sais tout de suite que ce n’est pas des gratteurs du dimanche. Giovanni à la contrebasse qui ne fait qu’un avec elle. Du moins, tu as l’impression qu’il fait un slow avec tellement il est pris par sa musique et Nicolas – oui, tu en as un deuxième pour le même prix – aux percussions, qui donne le rythme à toute la compagnie.

Cinq musiciens d’influences aussi variées que le Classique-Jazz, le Classique-Rock, le Blues-Funk-Picking, le Classique-Afro-Cubin et le Jazz-Swing-Hard font toute la richesse du quintette. Ca ! Si tu t’attendais à la danse des canards, c’est complètement raté. Quoique… Ce qui caractérise aussi le groupe, c’est l’humour qui s’en dégage. Très professionnels, c’est évident, cela ne les empêche pas de distiller quelques notes d’humour dans leurs morceaux. Et quand je dis notes, c’est également au sens musical du terme ! C’est ainsi, par exemple, que Jérémie arrive avec son violon à te faire une sirène de pompier, des mouettes au-dessus de la mer et même quelqu’un qui ronfle, c’est bluffant ! Alors, je suis sûre que si on leur demandait, et vu l’humour du groupe, ils arriveraient à te la faire à leur sauce, la danse des canards, et tu en serais baba !

Ce qui caractérise aussi les Swingin’ Partout, c’est une grande complicité entre eux que tu peux remarquer aux premières notes. Malgré toutes les influences variées, c’est l’amour commun pour ce que l’on appelle Jazz européen qui crée une harmonie sans faille. En particulier l’amour pour celui qui est la référence incontestable Django Reinhardt. Et cela, tu peux t’en apercevoir très vite aussi. On pourrait dire que les Swingin’ Partout sont les cinq mousquetaires du jazz manouche. Un pour tous, tous pour Django ! Toujours est-il que tu n’es vite plus maître de ton esprit. Tu es pris dans ces rythmes endiablés mélangeant subtilement de grands classiques, comme les yeux noirs, à des compositions originales faites par tel ou tel membre du groupe, comme les Brigades du swing, Rumba peña ou encore Quai de la seine…

Et c’est comme cela que tu te retrouves à la fin du concert et que tu n’as pas vu le temps passer. Mais justement, il y a un moyen bien simple de prolonger l’osmose et ce goût de trop peu, même s’ils t’ont mis une sacrée dose. Les Swingin’ Partout viennent de sortir leur deuxième album, bon swing… bon genre. En plus, tu sais ce que l’on dit, quand on aime, on ne compte pas, alors c’est carrément un double cédé que tu vas pouvoir acheter pour écouter chez toi. Forcément, ce n’est pas chez ton boucher que tu peux l’acheter, en demandant de t’en mettre deux tranches, mais dans les Fnac, le Furet du Nord, sur leur site, à la fin des concerts et si tu ne sais toujours pas, tu m’envoies un mail. Je ferai le facteur jusqu’à leur quartier général, la roulotte du Swingin’. Vingt titres pour le plus grand plaisir de tes oreilles et que tu pourras écouter et écouter encore sans modération. Tu vois, c’est vachement plus pratique pour ton salon et tu peux les emmener partout. Dans ta voiture, à ton bureau. Tu peux même mettre cela en MP3 pour courir avec et te donner du courage. Comme cela, tu sauras vraiment que ça swingue partout avec les Swingin’ Partout !

http://fr.myspace.com/swinginpartout

http://swingin-partout.com/

(préécoute sur la page musique)

Ravise auchi mes albums photos chu ch'côté, is sontent d'dins !