Ches nouvielles d'euch Net

16/09/2009 18:41

Chalut mes gins ! J’espère que t’es toudis in pleine forme ? Pon dins l’fond d’tin lit aveuc d’el fièf’… A’ch’t’heure, te peux ête dins l’fond d’tin lit pour ches câlins. Dins ch’cas, t’as bin raison d’in profiter. Chi min tiot loulou i ch’étot pon casser tôt à pour aller à sin traval, j’cros qu’j’auros fait l’même cosse. Pach’que cha n’est pon in ravisant ch’timps déhors qu’t’as invie d’quitter Sheila. Pardon, quitter ch’couette ! J’sus gramint dichtraire à’ch’t’heure. Ouais, j’sais bin, cha n’armonte pon à hier, qu’alle avot des couettes su ch’tiête, mais ch’est pach’que j’ai l’impréchion qu’in a fait un bion in arrière, dins ch’timps, d’pis qu’j’ai ravisé un nouvieau chite su ch’Net…

Infin, quind j’dis nouvieau chite, cha n’est pon tout à fait vrai. Je d’vros parler d’eune nouvielle verchion, plutôt. Eune verchion simplifiée et pus réactive com’ is l’ont voulu ch’princhipale intéressée et sin amoureux. Ouais, mes gins, j’veux parler d’euch chite à Ségolène que te peux découvrir ichi. Vingt dius ! Ch’est vrai qu’ch’est gramint simplifié ! Te récupères un fond d’écran d’Windows Vista ichi, te mets deusse colonnes d’chox et te balinches eune vidéo à ch’mitan aveuc Dame Ségolène qui dit ch’grind méche ! Alors, j’sais bin que, quind in est amoureux, in peut vif’ d’amour et d’ieau fraîque, mais quind même. J’ai cru, quind j’sus quée lad’chus, qu’in étot arv’nu à ches débuts d’Internet. Simplifié à l’extrême, chi bin que, lorch’que te navigues, cha prind vit’ l’ieau ! Te t’artreuves aveuc eune « error 500 » prech’que tout l’timps. Cha dot ête cha l’verchion pus réactive pach’que, ch’est vrai, j’sus rar’mint quée auchi vit’ su eune pache blanche !

Marie Toutoule, ch’est pon bin d’te moquer. André i a fait quo qu’i pouvot pour faire plaiji à cha bin-aimée, Dame Ségolène ! Ch’est vrai, mes gins, cha n’est pon sin job premier que d’faire des chites Internet. D’ailleurs, i n’in avot jamais fait jusque lal. Tertous i peut s’in rinde compte aveuc ch’prototype ! Même li, chez Andecom, i n’in a pon fait un à li ! Sin boulot, ch’est plein d’cosses, mais pon cha ! Toudis i est, mes gins, que même chi ch’étot pour faire plaiji, j’auros eu tindinche à l’app’ler Arthur, min André, ch’i m’avot présinté, même aveuc des zis d’merlan frits, eune facture d’41860 euros pour un bazar parel…

In app’lant cha : Eune préchtachion nouvielle su l’chite Désirs d’Avenir ! Est-che que te m’prinds pour eune indoulle, j’li auros d’mindé ? Te n’t’imagines quind même pon qu’em produc’chion artisanale d’Chabichous alle peut payer eune facture parelle ! Te t’rinds compte, ti, d’euch nombre d’chèvres à lait qu’i faut pour amortir eune somme com’ cheule-lal ! In parlache clair, mes gins, cha ch’traduit par : Te t’rinds compte, ti, d’euch nombre d’sympathisants qu’i faut pour amortir eune somme com’ cheule-lal ! Je t’nos gramint à préchiser ch’point, car ches habitants d’el cimpagne is n’parl’tent pon toudis com’ nou’z’autes.

Mes gins, i faut relativiser. Ch’étot l’grinte quinzaine d’promochion d’ches chites Internet et André i a prévu eune offre excepchionnelle aveuc sin pack d’basse. Eune chaîne TV qui va fonctionner deusse heures par jour, dechtinée à l’promochion d’euch dulchinée, bin évid’mint, pach’qu’alle l’vaut bin. Du moins, à ches zis qui, à m’mote, ravisent un peu trop du côté d’sin porte-monnaie. Com’ ch’est un poète, min André, te vas vir à quel point, i a auchi prévu eune « arboreschince téléphonique churtaxée pour produire des arsources. » J’te l’disos bin qu’i a l’poésie dins l’vinte, ch’ti-lal ! Mi, j’auros été pus prosaïque su m’facture in disant : Chi te veux causer à Ségolène dins ch’téléphone, te vas d’voir pacher à l’caiche !

Bah, ouais, qu’est-che que te cros ? Quind in vient d’raquer, qui com’ tertous i l’sait est l’résultante du miot racketter, eune somme parelle, in n’peut pus ch’permette d’mette eune standardiste ! Alors, ch’est Madame Ségolène qui va réponde à ch’téléphone. Pis, tout compte fait, cha quée bin, pach’qu’à part alle, i n’y a pon grind monte qui peut expliquer quo qu’ch’est qu’ches désirs d’avenir ! D’ailleurs, mes gins, je n’peux pon m’impêquer d’la vir in boubou. Eune sorte d’Madame Irma qui parl’te toudis d’l’av’nir. Cha pourrot prêter à confusion quind ches gins is von’tent téléphoner. V’là eune schène pochipe :

— Bonjour Madame Ségolène, j’auros querre à savoir quo qu’te peux faire pour min av’nir ? »

— Qui es-tu, Chère Sympathisante à ma Noble Causse d’Désirs d’Av’nir ?

— Alphonsine, j’ai quate-vingt-diche-huit ins… Bin cha alors, alle m’a raccroché à ch’nez !

Au moins, chi alle avot fait des études d’méd’chine, alle aurot pu li prescrir’te des « Calment » pour faire vingt-quate ins d’pus ! Cha, ch’est d’l’av’nir !

In in vient just’mint à ch’dernier lot qu’alle va avoir aveuc sin kit d’basse. André i a auchi prévu eune boutique d’vinte d’produits. Cha, ch’est l’av’nir auchi, mes gins ! Tertous i sait qu’i faut gramint miser su ch’t’e-commerche à’ch’t’heure. Infin, j’avoue qu’j’sus in train d’em d’minder quo qu’alle va bin pouvoir vinde su sin chite. Des idées, i n’y in a pus gramint. Alle avot pourtint investi dins un frigidaire pour les garder à frais jusqu’in 2012, mais alle a dû l’vider pour mette ch’produc’chion d’Chabichous. Tiens, bin n’in v’là eune idée qu’alle est bionne ! Eune bielle produc’chion d’Chabichous pour ches sympathisants à ch’causse. Au lieu de ch’te simpe étiquette d’ù qu’i y a l’guiffe d’eune biquette, in général, in pourrot mette ch’guiffe à Ségolène. Nin, nin, nin ! N’y vos aucune allusion d’em part. Ch’est du marketinge. D’ailleurs, i faudrot soigner l’nom d’euch produit aveuc un tite qui pète : Chabichou de l’Avenir 2012. Bin intindu, cha s’rot eune AOC (André Organizing Company) !

Com’ aveuc Ségolène, in in a toudis pus que prévu par ch’programme, in pourrot dir’te que ch’est fromache et dessert. Auchi, j’prévoiros eune tiote gourmandisse. Quo qu’ch’est qu’t’in pinses, ti, d’eune gelée com’ ches Américains. Te sais, ch’truc qui boug’te tout seu dins t’n’achiette ! Mais alors pourquo pon un bion dessert bin français, te m’diras ? Ch’est pach’que je n’voudros pon qu’i li arriv’te ch’même problème qu’à Brice Hortefeux chi alle chosit eune boîte de tiots beurre… Bref, te vas comprinde min chox. Faut qu’in li donn’te un nom à ch’produit. Ichi, i s’rot tout treuvé : Gelée Royale ! Te n’peux pon m’dir’te que cha n’est pon vindeux ! Tertous i sait qu’ch’est gramint bion pour l’sinté. Chi t’as eune bionne sinté, te peux n’ête assuré d’avoir un av’nir. I parôt qu’ch’est même bion pour t’libido et donc ches désirs ! Aveuc d’el gelée Royale, t’es fin bénache ; mi, j’te l’dis !

In pach’te rapid’mint su tous ches gadgets standards casquette, écharpe, boîte à idées (livrée vide, faut pon rêver), agenda (uniqu’mint dichponipe aveuc l’année 2012), stylo. Pis après l’stylo UMP qui cante l’Marseillaisse, cha va ête dur’te d’faire miux. I faut raviser loin et, in même timps, qu’cha sot éducatif. Ch’est toudis bion d’parier su l’av’nir, cor’ li. Donc, j’ai bin m’tiote idée : Un jeu d’compte i est bion. Cha permettrot à ches sympathisants, qui sont auchi des militants, d’apprinde à compter ! Pis, in pourrot faire cha in jeu pour manicraque informatique. Te sais, ch’est fachile. Quind ch’calcul i est mauviais, ch’est l’guiffe à Titine qui apparôt. Quind i est bion, cheule à Ségolène…

V’là, mes gins, après ch’rubrique littéraire d’el dernière fos, chouvint ches canchons et parfos des archettes, à’ch’t’heure, eune rubrique multimédia. Te n’pourras pon m’dir’te que je n’prinds pon soin d’assouvir tes désirs pour qu’in continue à avoir un av’nir !

Désir d'endives sélectionné dans Humour et Parodie / Doublage

Messache chpécial :

J’vais juss’ terminer par eune actualité moins drôl’te. Chi je t’in parl’te, ch’est pach’qu’in avot échingé quéques miots, li et mi, il y a quéques mos. J’ai eune pinsée toute particulière pour Filip Nicolic qui nous a quitté ch’matin. J’sais bin qu’i faut partir un jour, mais à trinte-chinq ins, ch’est gramint tôt quind in a cor’ tint d’av’nir d’vint so...