L'chine alle n'est pon loin

4 Septembre 2009

Chalut mes gins ! Après eune rintrée su ches capieaux d’roues, in ch’apprête à vif’ l’ouiquen l’pus animé d’el ville d’Lille, com’ tous ches ins. Ch’est l’Brad’rie que tertous i invie, qu’i sot d’Paris, d’Marseille, d’Bruxelles, d’Berlin, d’Londres et chertain’mint cor’ bin pus loin. Ch’pus grint vide-grenier, mais i n’faut pon oublier nin pus ch’vide-cave et même ch’vide-placard. Autant d’étales qui ch’étal’tent su eune chintaine d’kilomètes. Alors, ch’timps d’un ouiquen, j’vais faire com’ ti. J’vais oublier l’politique, ches actualités, oublier ches virus. L’seu que j’vais m’permette d’attraper, ch’est ch’virus d’euch bradeux. Ch’ti qui met des soulis confortapes et qui n’oublie pon ch’tiote lampe d’poque. Ch’décor i est planté. I n’y a pus qu’à plonger dins ch’te véritape caverne d’Ali Baba, rimplie d’trésors à chiel ouvert…

In n’peut pon parler d’trésors chins arv’nir quéques instints su ches origines. Pis, cha n’armonte pon à hier, puich’qu’alle a vu l’jour in 1523. Ch’étot alors eune foire qui ch’trinsforma progressiv’mint in vide-grenier quind ches domestiques is ont eu l’drot d’vinte ches objets usagés d’ches maîtes, inte l’coucher et le l’ver d’euch solel. Cha durot chept jours. Ch’miot d’brad’rie, in li donn’te deusse origines. « Braaden » d’euch flamint qui veut dir’te « rôtir », pach’qu’i y avot gramint d’marchands qui f’sotent rôtir des viantes et des harengs pour ches partichipints. Mais in donn’te auchi eune origine echpagnole aveuc ch’miot « barato » qui chignifie « pon quer ». Partint d’euch princhipe que Lille étot echpagnole in pleine Flandres, te vos que ches deusse echplicachions alles sont corrèques. A ch’fil d’euch timps, tout i ch’vérifie cor’. In treuve des kebabs in guisse d’viante grillée et des moules qui n’sintent guère meilleu que ch’t’hareng. Pon quer, cha rechte à vir, mais te peux toudis essayer d’marchinder !

Côté trésor, i y a tout quo qu’te peux rêver et même miux. Même chi te peux acater un objet d’occasion, pach’que t’as invie d’el payer moins quer que dins eune boutique, i faut quind même avouer que ch’est l’paradis d’euch collec’chionneur. Armé d’euch lampe d’poque, d’sin sac à dios et d’eune bionne paire d’gambes, qui von’tent ch’rapp’ler à sin bion chouv’nir ch’lind’main, le v’là fin prêt pour eune nuit d’chine. Ch’est sûr’te, mes gins, te peux faire des bionnes affaires et treuver tin bonheur même quind i fait jour, mais cha rechte l’nuit ch’momint l’pus privilégié. Tout i est dins ch’t’éclairache. Ch’faisceau de t’lampe alle donn’te eune aute diminchion à l’objet d’tin désir. Te sais, ch’est un peu com’ un artiste qui arrive su chène éclairé par le halo d’un projecteur d’pourchuite. Rin i n’vient parasiter tes zis, tin argard i est conchintré et tin admirachion à ch’zénith !

In va avincher tout duch’mint d’vint ches étales. D’toute fachon, te n’as chouvint pon l’choix. Pis, ch’laicher importer, lal auchi, te n’as parfos pon l’chox, dins un voyache dins ch’passé. I est timps d’évoquer quéques idées à collec’chionner. L’incontournape marchand qui proposse d’vielles cartes postales, auprès duquel te t’arrêtes. Te ravises furtiv’mint jusqu’à treuver l’nom d’tin pat’lin. Alors, te t’attardes pus longu’mint. Ravise, ch’est tin quartier ! Vingt dius ! I n’y a pon gramint d’baraques, ch’est qu’eune imminche pâture aveuc des vaques. A’ch’t’heure, l’seu coin vert, pach’que même chi ch’carte alle est in noir’te et blinc, te sais qu’ch’est du vert, ch’est l’feu tricolore in bas d’tin immeupe…

Avinche cor’ un peu, in arrive à eune étale d’ù qu’in treuve eune multitute d’porte-clés. Ah ! Cha t’arplong’te dirèque à l’fin d’ches années choichinte. Eune vraie folie, ches porte-clés. L’meilleu objet publichitaire et toutes ches marques alles l’avotent bin compris. Alors, auchitôt, in ravisant cha, te t’chouviens qu’ti-auchi, t’in avos gramint. Ravise, l’tiote cache aveuc un ojieau noir’te, ch’étot l’pie qui cante. Bin avint qu’alle cante pour Cadbury. Pis ch’ti-lal, ch’vaque qui rit in miniature. Et cor’ ch’ti-lal, eune mini plaquette d’chocolat Delespaul…

Quéques mètes pus loin, ravise-me ch’lustre in alu brossé. Ti-auchi, t’in avos un tout parel aud’chus d’tin lit. Pis, ch’t’echpèce d’boule oranche, que t’mère alle étot chi fier d’exhiber quind alle archevot des gins à l’apéro. Alle muchot des glachons et ti, i fallot toudis qu’t’in mettes un dins tin verre pour faire com’ ches grinds. Oh ! Et pis cha ! L’dernière que t’as vue, ch’étot chez eune vielle tante. Te t’chouviens, te juos toudis aveuc ches pods d’euch balanche d’Roberval. Alle n’minquot pon, chaque fos, de t’dir’te qu’i n’fallot pon perde ch’tiot !

Tiens, in arrif’ dins ch’coin d’ches vindeux d’disques. Cha auchi, ch’est incontournape ! D’ù qu’alle in est t’collec’chion ? I t’in minqu’te cor’ gramint d’tin idole ? Alors ch’est ichi qu’te vas chertain’mint treuver tin bonheur. Pis, t’as vu, ch’vindeu i est corrèque. Ches prix is sont raisonnapes et i a gramint d’chox. Com’ ch’est bieau ches grinds disques, ches vinyles. Ch’étot bin miux que ch’musique numérique d’ù qu’te cliqu’tes mais qu’te n’sais même pus à quo i arsimpe ch’canteur. Pour ceusses qui sont fans d’Michael Jackson, ch’est chertain’mint l’année d’ù qu’i faut compléter ch’qui t’minqu’te, pach’que cha richqu’te d’printe d’el valeur dins ches années à v’nir. Te richqu’tes d’avoir d’pus in pus d’mau à treuver quo qu’te veux…

Tiens, mais ch’est ti ! J’étos sûr’te de t’artreuver d’vint un étale d’bouquins. Ouais, mes gins, in quée auchi su des amis, à l’Brad’rie. In dit toudis que ch’monte i est tiot. Ch’est min inquêtriche favorite, que te comminches à connaîte auchi. M’Bridget Columbo alle est in train d’faire l’plein d’bouquins, com’ chaque fos. I faut dir’te, qu’intre deusse inquêtes, alle pach’te sin timps à lir’te. Ch’est eune vraie dévoreusse d’miots. Attends, m’bielle, j’vais t’aider à porter un sac. Te sais, ch’pods d’ches miots…

Mine d’rin, in in a d’jà fait pon mau de qu’min, mes gins. I s’rot p’t-ête timps d’archarger ch’machine avint d’aller pus loin. Quo qu’t’in pinses, ti’z’aute, d’faire eune pausse aveuc eune bionne moule-frites ? Ch’est quind même l’bonus de ch’te brad’rie. Pis, com’ i fait gramint soif auchi, in va in profiter pour printe eune bionne pinte. Bionne Brad’rie, mes gins. In va p’t-ête ch’croiser. Cha s’rot aveuc plaiji qu’in éching’ra quéques miots, à ch’t’hasard d’eune étale. J’te dédicach’rai même eune photo, chi te veux…